呢個地方其實阿史一直都好想去睇下，之不過，實在太山長水遠，所以一直拖下拖下無去到。乜嘢地方咁得意呢？就係位於灣仔峽嘅警隊博物館。

話明山長水遠，呢個地方就梗係交通唔多方便啦！坐上山巴士之後仲要行一段路上山先去到，呢個地方以前係灣仔峽警署，1988年成為咗警隊博物館，館內有專題展覽廰、三合會及毒品展覽廳、警隊歷史展覽廳等，介紹一下香港警隊歷史，仲有好多同香港過往嘅犯罪有關嘅展品。

要提一提大家，最近就有關於金融欺詐罪行嘅展覽，展出過百件偽造金融票據以及欺詐案件相關證物，好值得去睇下。不過館內係唔俾影相，所以要史友們自己去睇睇喇！


至於點解阿史一直想去呢度呢？就係因為想睇下1915年响龍躍頭被射殺嘅「上水之虎」頭顱標本。